Tuesday , May 23 2017
Breaking News

இலக்கு வைக்கப்பட்ட ஸாலிஹான பெண்கள்.

ஜம்மியதுல் உலமா வழங்கிய ஃபத்வாவினால் ஓரவஞ்சனை செய்யப்பட்டுப் பத்தினித்தனம் இலக்கு வைக்கப்பட்ட ஸாலிஹான பெண்கள் சார்பாக ஜம்மியதுல் உலமாவுக்கு ஒரு கடிதம்.

• குறித்த பத்வா சம்பந்தமாக, இஸ்லாமிய ஷரீஅத்தோடு சம்பந்தப்பட்ட விடயங்கள் தாராளமாகவே பேசப்பட்டுக்கொண்டிருக்கின்றன. அவற்றைப் பற்றிப் பேசுகின்ற தகுதியும் எனக்கில்லை. அதை உரியவர்களிடம் விட்டுவிட்டு, பொதுவாக சட்டத்துறையோடு சம்பந்தப்பட்ட வலியுறுத்தப்பட வேண்டிய ஒரு விடயத்தை மாத்திரம் இங்கு சுட்டிக்காட்ட விரும்புகின்றேன்.

• சட்டத்துறை படித்தவர்கள் அறிந்திருப்பார்கள், இஸ்லாமிய சட்டவியல் உட்பட அனைத்து சட்டவியல்களிலும் சட்டத்துறைக்கென்றே பொதுவாக உள்ள சில அகிலார்ந்த விதிகள் காணப்படுகின்றன. இவ்வாறான விதிகள் எக்காலத்திலும் எந்த நிலைமையிலும் மாற்றத்துக்குற்படுவதில்லை. உதாரணமாக, குற்றவியல் சட்டங்கள் பின்நோக்கிப் பிரயோகிக்கப்பட முடியாது என்பது இவற்றுள் ஒன்றாகும்.

அதாவது, களவெடுத்தால் கையை வெட்ட வேண்டும் என்ற சட்டம் இன்று அமுலுக்கு வந்தால், நேற்றுக் களவெடுத்தவன் விடயத்தில் அந்த சட்டத்தை அமுல்படுத்த முடியாது. நேற்று அமுலிலிருந்த சட்டத்தை வைத்தே அவனுக்கு நீதி வழங்கப்பட வேண்டும்.

• அதே போன்ற இன்னுமொரு விதி தான், தீர்ப்பு வழங்குபவர், அல்லது முடிவெடுப்பவர் சுதந்திரவானாகவும், எந்த வித அழுத்தங்கள், அச்சுறுத்தல்களுக்கும் உட்படாதவராகவும் இருத்தல் வேண்டும் என்பதாகும். தீர்ப்பு வழங்குபவர் அல்லது முடிவெடுப்பவர் அழுத்தங்களுக்கும் அச்சுறுத்தல்களுக்கும் உள்ளாகியிருந்தார் என்ற விடயம் எப்போது அறியப்படுகின்றதோ, அக்கணத்திலிருந்து குறித்த தீர்ப்பு அல்லது முடிவு சட்டத்தின் முன்னால் சட்ட ரீதியாகவே செல்லுபடியற்றதாகி விடுகின்றது.

அந்தத் தீர்ப்புக்கோ முடிவுக்கோ முரணாக நடப்பது சம்பந்தப்பட்டவர்களைக் குற்றவாளியாக்காது. உதாரணமாக, ஒரு வழக்கில் நீதிபதிக்கு இலஞ்சம் வழங்கப்பட்ட விடயம் ஆதாரங்களுடன் நிரூபிக்கப்படும்பட்சத்தில் குறித்த வழக்கு உடனடியாக செல்லுபடியற்றதாகி விடுவது மாத்திரமல்ல, அது குறித்த நீதிபதியுடைய முன்னைய தீர்ப்புக்களையும் கேள்விக்குறியாக்குவதோடு இதன்பிறகு நீதிபதியாக இருக்கின்ற தகுதியையும் அவருக்கு இல்லாமலாக்கி விடுகின்றது.

• இப்போது, ஜம்மியதுல் உலமாவின் நடப்பு விவகாரத்துக்கு வருவோம். நிகாப் விவகாரத்தில் ஜம்மியதுல் உலமாவும் அதன் தலைவரும் பட்டப்பகலில் பகிரங்கமாகவே அச்சுறுத்தல்களுக்கும் அழுத்தங்களுக்கும் உட்படுத்தப்பட்டது நாடறிந்த உண்மையாகும். அதன் தலைவர் பதவியைக்கொண்டும் அச்சுறுத்தப்பட்டார்; தான் தலைமை தாங்குகின்ற நிறுவனத்தின் எதிர்காலத்தைக்கொண்டும் அச்சுறுத்தப்பட்டார்.

எனவே, அவர் தனது சுய இலாபத்துக்காகவோ, அல்லது அந்த நிறுவனத்தின் எதிர்காலத்தைக் கருத்திற்கொண்டோ அந்த அழுத்தங்களுக்கும் அச்சுறுத்தல்களுக்கும் அடிபணிந்துள்ளார் என்பது தெளிவாகின்றது. இப்படிப்பட்ட ஒரு சூழலில் இருப்பவருடைய தீர்ப்புக்களோ முடிவுகளோ எந்த வித சட்ட ரீதியான பெறுமானங்களும் அற்றதாகிவிடுகின்றது; நம்பகத் தன்மையை இழந்து விடுகின்றது. சம்பந்தப்பட்டவர்களுக்கும் கூட அந்தத் தீர்ப்பையோ முடிவையோ ஏற்றுக்கொள்ளாமலிருப்பதற்கான முழுச்சுதந்திரமும் சட்ட ரீதியாகவே இயல்பாகப் பிறந்து விடுகின்றது. ஏற்றுக்கொள்ளாமலிருப்பது அவர்களைக் குற்றவாளியாக்கவுமாது.

• அப்படியே குற்றம் இருந்தாலும், அது அழுத்தங்களுக்கும், அச்சுறுத்தல்களுக்கும் முன்னால் தமது கையாலாகத் தனத்தைப் பல முறை நிரூபித்து, அப்படிப்பட்ட பொறுப்புவாய்ந்த ஒரு இடத்தின் நம்பகத்தன்மையை இல்லாமலாக்கிய தலைமையையே சாரும்.

எனவே ஜம்மியதுல் உலமா முதலாவதாகவும் அவசரமாகவும் செய்ய வேண்டிய வேலை, பத்வாக்களை வழங்குவதல்ல. மாறாக, படுமோசமாக வீழ்ச்சி அடைந்துள்ள தனது நம்பகத்தன்மையைக் கட்டியெழுப்புவதாகும்.

அப்போது மட்டுமே வழங்குகின்ற தீர்ப்புக்களும், எடுக்கின்ற முடிவுகளும் பெறுமானமுள்ளவைகளாக மாறும். இதன் முதலாவது கட்டம், ஜம்மியதுல் உலமா போன்ற சமூகத்துக்குறிய ஒரு சொத்தை, அச்சுறுத்தல்கள் மூலமாகவும், ரவுடித்தனத்தின் மூலமாகவும் தமது சொந்த சொத்தாக மாற்றிக்கொள்ள முனையும் குழுக்களுக்கெதிராக ஒரு பத்வாவை வழங்குவதாக இருக்க வேண்டும், அவர்களது ரவுடித்தனத்திலிருந்து ஜம்மியதுல் உலமாவைப் பாதுகாக்க வேண்டும் என்பதே அனைவரதும் நியாயமான எதிர்பார்ப்பாகும்.

வஸ்ஸலாம்.
Rizam Al Hakeem